Mbrëmjen e sotme ish-kryeministri Sali Berisha realizoi një lidhje me Skype për “Zonë e lirë”, ku ka hedhur akuza të rënda ndaj qeverisë.
Berisha tha se po fsheh numrin real të viktimave nga COVID-19, sepse kryeministri Rama do të ngrejë lartë punën e tij dhe masat e marra për kufizimin e përhapjes.
Sipas ish-kryeministrit, në rrethe nuk po kryhet testimi as për njerëzit që kanë shfaqur simptoma dhe se dhjetëra persona kanë humbur jetën deri tani.
Po ashtu, Berisha e cilësoi të papranueshëm faktin që të dhënat rreth viktimave dhe të prekurve jepen nga Ministria e Shëndetësisë, që sipas tij është një institucion i pabesueshëm.
“Me bindje të plotë them se qeveria po fsheh numrin e vërtetë të viktimave. Ramsi do të lavdërojë punën e tij dhe të tregojë se njerëzit janë gjallë sot falë tij. Në rrethe nuk po kryehet testimi i njerëzve që kanë shfaqur simptoma. Sipas burimeve të mia edhe në pavionet e spitaleve kanë vdekur shumë persona. Qeveria fsheh numrin e varrimeve sepse tashmë me situatën e krijuar në vend nuk lejohet të marrësh pjesë në varrime dhe askush se merr vesh që dikush ka vdekur. Kryeministri e tha vetë se kanë vdekur 51 persona, e ngatërroi shifrën, tha të vërtetën. Më thoni pak ju, pse duhet të njoftoj Ministria e Shëndetësisë se kush ndërron jetë. Për mua ajo është më e pabesueshmja.”- tha ndër të tjera Berisha gjatë fjalës së tij.
Për akuzat e Berishës pati dyshime edhe nga paneli, teksa opinionisti i emisionit Arjan Curri, tha se deklarata e Ramës se kanë vdekur 51 persona ishte një lapsus me viktimat e tërmetit.
Mirëpo, Berisha këmbënguli duke thënë se kryeministri nuk e ka përgënjeshtruar deklaratën e tij.
Më pas, Çani pyeti rreth kësaj çështjeje edhe mjekun Pëllumb Pipero, i cili tha se nuk ka informacione rreth kësaj dhe se zgjedh të besojë shifrat zyrtare.
Deri tani në vendin tonë janë regjistruar 23 viktima.
