Holandezët jo vetëm që krijuan trazira por edhe paskan qenë të pajisur “mirë” edhe me lëndë narkotike. Një shtetas 27-vjeçar holandez është arrestuar nga policia e Tiranës, pas një sherri të ndodhur ditën e djeshme në rrugën “Abdi Toptani.”
Sherri ka ndodhur në orën 00:10 minuta, 2 orë pas përfundimit të finales së Conference League, në stadiumin “Air Albania.” Por pas kontrollit, blutë i kanë gjetur tifozit holandez me iniciale K.B një sasi lënde narkotike e dyshuar kokainë. Ndërkohë materialet i kaluan Prokurorisë, për veprime të mëtejshme procedurale.
Njoftimi i Policisë së Shtetit:
Specialistët për Hetimin e Narkotikëve bënë arrestimin në flagrancë të shtetasit K. B., 27 vjeç, banues në Holandë, për veprën penale “Prodhimi dhe shitja e narkotikëve”.
Më datë 26.05.2022, rreth orës 00:10, shërbimet e Policisë kanë marrë njoftim për një konflikt në rrugën “Abdi Toptani”. Pasi kanë shkuar në vendngjarje, shërbimet e Policisë kanë shoqëruar në ambientet e Komisariatit, shtetasin hollandez K. B.
Gjatë kontrollit fizik nga shërbimet e Policisë, shtetasit K. B. iu gjet dhe iu sekuestrua, në cilësinë e provës materiale, një sasi lënde e dyshuar narkotike e llojit kokainë.
Në përfundim të veprimeve u bë arrestimi në flagrancë i shtetasit K. B.
Materialet i kaluan Prokurorisë, për veprime të mëtejshme procedurale.
