Fushata elektorale ka ndezur motorët për forcat politike, dhe socialistët janë hedhur të parët në “sulm” për ta bërë realitet edhe mandatin e tretë…
Vrulli i punës elektorale ka zënë edhe ministrin e Turizmit dhe Mjedisit, Blendi Klosi, i cili është njëkohësisht edhe i deleguari i PS-së, për qarkun e Beratit.
Kaq shumë është mbërthyer nga “ethet elektorale” Blendi Klosi, sa si i deleguar i PS-së që është, ka harruar jo vetëm detyrën e ministrit të Turizmit, duke e “ndritur” me këtë të fundit, por edhe masat anti-Covid që qeveria e tij i apelon me të madhe.
Këtë e tregon më së miri edhe ky takim elektoral me socialistët në Berat, ku që të gjithë të thirrur në takim janë të pajisur me maska dhe mbajnë distancimin fizik, në një kohë që vet i deleguari Klosi, nuk e mban maskën në asnjë moment.
Fotot e siguruara nga “GazetaReforma.com” tregojnë aktivitetin që i deleguari i PS-së, Blendi Klosi, ka zhvilluar në Berat, si edhe një tjetër disa kohë më parë në Vlorë me operatorë të njësive turistike.
Në të dyja këto takime, ministri Klosi flet dhe takon persona të ndryshëm, por pa mbajtur as maskën dhe pa ruajtur as distancimin fizik.
Duket se kjo gjë nuk i ka rënë në sy kryeministrit Rama ose Ogertës, se me siguri njëri nga të dy do t’ja kishte tërhequr pak “veshin” Blendit, në lidhje me koronavirusin.
/GazetaReforma.com/
