Policia ka arrestuar një 34-vjeçar në Gramsh pasi ushtronte dhunë fizike dhe psikologjike ndaj prindërve dhe motrës së tij.
Personi me iniciale E.P akuzohet për veprën penale “Dhuna në familje”.
Ndërkohë që materialet i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
“Specialistët e Hetimit të Krimit të Komisariatit të Policisë Gramsh arrestuan në flagrancë shtetasin E. P., 34 vjeç, banues në Gramsh, për veprën penale “Dhuna në familje”, pasi ka ushtruar dhunë fizike dhe psikologjike ndaj prindërve dhe motrës së tij”, thuhet në njoftimin e policisë.
Theksojmë se dhuna në familje është një problem social mjaft i përhapur në shoqërinë tonë dhe që kryesisht ka si bazë mentalitetin patriarkal.
Në bazë të statistikave, rastet e dhunës ne familje për vitin 2021 janë rritur me 12,4% në krahasim me vitin 2020.
Raporti vjetor i Prokurorisë së Përgjithshme thotë se numri më i lartë i procedimeve penale është regjistruar në Gjykatën e Tiranës, me 29% të totalit, ndërsa diferencën më të lartë e ka qarku i Lezhës me 88 raste dhune për 100 mijë banorë.
Vlen të përmendet se pas Lezhës, Vlora është qarku i dytë në vend, ku rastet e dhunës janë më të shpeshta, përkatësisht 80 denoncimi për 100 mijë banorë të regjistruar në 2021.
