Negociatat për anëtarësimin në BE me Shqipërinë nuk janë hapur ende dhe shpresa duket se është venitur, në një kohë që qeveria ka një “mal” me kushte për të realizuar.
Megjithatë një apel i ri ka ardhur nga një prej diplomateve më kryesore në vend, ambasadorja e re franceze në Shqipëri, Elisabeth Barsacq.
Ajo nga qyteti i Elbasanit ku kishte shkuar për një vizitë, ka folur në lidhje me procesin e integrimit të Shqipërisë drejt BE-së.
Diplomatja franceze theksoi se, Shqipëri duhet të plotësoje kushte të cilat i janë vendosur nga BE, në mënyrë që të hapen negociatat, duke shtuar se, tashme nuk ka kthim pas dhe se ato duan që t’i hapin negociatat.
Po ashtu ambasadorja franceze theksoi se, “për sa i përket marrëdhënies mes Francës dhe Shqipërisë, kemi një lajm shumë të mirë atë të ardhjes në Shqipëri të Agjencisë Franceze të Zhvillimit, e cila do të vijë këtu dhe do të financojë projekte dhe bashkëpunime me qeverinë shqiptare”.
“Siç e dini mirë ka kushte për të plotësuar, siç janë shteti i së drejtës, lufta kundër korrupsionit, janë kushte të cilat janë vënë dhe që unë nuk po i përsëris të gjitha.
Dhe kjo nuk varet as nga Franca, as Kroacia apo Polonia, por nga Shqipëria. Të gjitha këto ne i bëjmë së bashku me vende të tjera të Bashkimit Europian, se duhet ta dini që BE është partneri numër një i Shqipërisë, përsa i përket ndihmës publike, sa i përket projekteve të modernizimit të administratës publike. Kjo është fare normale, sepse Shqipëria është një vend evropian. Pra ky është një proces pune, i cili po zhvillohet, megjithatë mendoj që Shqipëria i ka të gjitha mundësitë që një ditë të jetë anëtare e Bashkimit Europian. Dhe punë ime këtu, si dhe puna e të gjithë ambasadorëve të delegacionit të Bashkimit Europian në Shqipëri, është të punojmë së bashku për ta ndihmuar Shqipërinë për këtë qëllim”,- tha diplomatja Franceze.
Ambasadorja franceze Barthacq, zhvillon sot vizitën e parë zyrtare në Elbasan, në Aleancën Franceze.
/GazetaReforma.com/
