Një shkarkim me rëndësi ka ndodhur dhe këtë herë bëhet fjalë për drejtuesin e Albpetrol, Kastriot Bejtaj.
Ka qenë vet Ministrja e Infrastrukturës dhe Energjisë, Belinda Balluku që e ka shkarkuar Bejtajn nga detyra për të vendosur në vend të tij, Dritan Spahiun. Vendimi është marrë nga Këshilli mbikëqyrës dje, por u publikua sot pasdite.
Dritan Spahiu ka mbajtur më herët vendin e drejtorit të politikave hidrokarbure në Ministrinë e Energjetikës, por është shkarkuar nga ish-ministri Damian Gjiknuri pas akuzave për abuzime. Mirëpo ky fakt nuk është përfolur nga ministrja Balluku dhe ka vendosur që ta emërojë atë si drejtues të Albpetrolit.
Ky zëvendësim vjen në një moment që Albpetrol pritet të marrë një tender për shitjen e 75 mijë tonëve naftë bruto me një vlerë prej 2.5 mld lekë. Albpetrol sapo ka miratuar planin strategjik të prodhim-shfrytëzimit, strukturën dhe planin e masave dhe për 2018 rezulton kompania shtetërore me fitimin më të lartë.
Nuk dihet ende arsyeja e shkarkimit të Bejtas dhe mbi të gjitha pse emri i Spahiut në këtë strukturë, megjithatë presim ta zbulojmë në ditët në vijim.
