Gjatë një proteste përpara Bashkisë së Tiranës, ish-kandidati për kryebashkiak, Belind Këlliçi, hodhi akuza të rënda ndaj administrimit të qytetit. Sipas tij, Bashkia e Tiranës është bërë vendi kryesor ku zhvillohen veprime korruptive dhe vjedhje të hapura të parave të qytetarëve.
“Kjo godinë është sot skena më e madhe e krimit në Shqipëri,” deklaroi Këlliçi gjatë fjalës së tij. Ai shtoi se “një kryetar bashkie që çdo ditë që shkon në atë zyrë, shkon me bandën 5D, për të vjedhur, taksat tuaja, shkollat tuaja, të ardhmen tuaj.”
Këlliçi vuri në pah se zbulimet e bëra së fundmi nga ai dhe ekipi i tij kanë treguar se si janë keqpërdorur mjetet publike: “Vetëm në këto muajt e fundit kemi shpalosur para jush, një skemë vjedhjeje të padëgjuar dhe të pahasur më parë. Deri tani kemi faktuar qytetarëve, por mbi të gjitha SPAK-ut, se si janë paguar 132 milionë euro për një incenerator që nuk ekziston.”
Ish-kandidati bëri gjithashtu thirrje të veçantë për policinë dhe forcat e rendit, duke iu drejtuar ata që të mos arrestojnë protestuesit pasi ata po luftojnë kundër korrupsionit që i prek të gjithë, përfshirë edhe forcat e rendit. “Të nderuar anëtarë, të nderuar drejtues të Policisë së Shtetit, anëtarë të forcave të rendit. Ta keni të qartë se askush nga protestuesit nuk ka asnjë problem me ju. Përkundrazi, ne dalim në këtë betejë edhe për ju,” tha Këlliçi.
Kjo protestë përcakton një moment tensioni të lartë midis qytetarëve dhe administratës së Bashkisë së Tiranës, me kërkesa për llogaridhënie dhe transparencë të plotë për menaxhimin e fondeve dhe projekteve publike.
