Ditën e sotme qeveria shqiptare ka nënshkruar 3 marrëveshje ndërkombëtare që prekin fusha të ndryshme, përkatësisht me Izraelin, Arabinë Saudite dhe Bashkimin Evropian.
Ky vendim bëhet i ditur nga kryeministri Rama dhe hyn në fuqi menjëherë. Marrëveshja e parë ka të bëjë me rritjen e bashkëpunimit në fushën e arsimit, rinisë, shkencës dhe kulturës me Izraelin, për vitet 2022-2025.
Marrëveshja e dytë është ndërmjet Këshillit të Ministrave dhe Bashkimit Europian, për projektin “EU4CULTURE”.
Ndërsa marrëveshja tjetër ka të bëjë me projektin e ndërtimit të rrugës Tiranë-Elbasan-Qukës-Qafa e Plloçës, e nënshkruar mes Këshillit të Ministrave dhe Fondit Saudit për zhvillim.
V E N D I M
PËR
MIRATIMIN, NË PARIM, TË PROGRAMIT TË BASHKËPUNIMIT ARSIMOR, SHKENCOR, KULTUROR DHE RINOR, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË SHTETIT TË IZRAELIT, PËR VITET 2022-2025
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Arsimit dhe Sportit, Këshilli i Ministrave
V E N D O S I:
Miratimin, në parim, të programit të bashkëpunimit arsimor, shkencor, kulturor dhe rinor, ndërmjet Këshillit të Ministrave të Republikës së Shqipërisë dhe qeverisë të shtetit të Izraelit, për vitet 2022-2025, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
-V E N D I M
PËR
MIRATIMIN, NË PARIM, TË MARRËVESHJES SË BASHKËPUNIMIT ME SHKËMBIM NOTASH, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE BASHKIMIT EVROPIAN, PËR PROJEKTIN “EU4CULTURE”
Në mbështetje të nenit 100 të Kushtetutës dhe të neneve 10 e 12, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Kulturës, Këshilli i Ministrave
V E N D O S I:
Miratimin, në parim, të marrëveshjes së bashkëpunimit me shkëmbim notash, ndërmjet Këshillit të Ministrave të Republikës së Shqipërisë dhe Bashkimit Evropian, për projektin “EU4Culture”, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
-V E N D I M
PËR
MIRATIMIN, NË PARIM, TË MARRËVESHJES SË HUAS NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE FONDIT SAUDIT PËR ZHVILLIM, PËR PROJEKTIN E NDËRTIMIT TË RRUGËS TIRANË-ELBASAN-QUKËS-QAFA E PLLOÇËS, “HUA SHTESË”
Në mbështetje të nenit 100, të Kushtetutës, të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, dhe të neneve 26 e 27, të ligjit nr.9665, datë 18.12.2006, “Për huamarrjen shtetërore, borxhin shtetëror dhe garancitë shtetërore të huas në Republikën e Shqipërisë”, të ndryshuar, me propozimin e ministrit të Infrastrukturës dhe Energjisë e të ministrit të Financave dhe Ekonomisë, Këshilli i Ministrave
V E N D O S I:
Miratimin, në parim, të marrëveshjes së huas ndërmjet Këshillit të Ministrave të Republikës së Shqipërisë dhe Fondit Saudit për Zhvillim, për projektin e ndërtimit të rrugës Tiranë-Elbasan-Qukës-Qafa e Plloçës, “hua shtesë”, me një hua në shumën 183 750 000 (njëqind e tetëdhjetë e tre milionë e shtatëqind e pesëdhjetë mijë) rial saudit, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
