Turistët amerikanë të vaksinuar kundër Covid-19 do të jenë në gjendje të vizitojnë Bashkimin Evropian në muajt e ardhshëm, tha shefi i Komisionit Evropian Ursula von der Leyen në një intervistë të Dielën me The New York Times.
Duke sinjalizuar një ndryshim të madh në politikën e BE ndërsa vaksinimet rriten në të gjithë botën, von der Leyen nuk dha asnjë kalendar, por Times tha se rregullat e reja mund të ishin në fuqi deri në këtë verë.
“Amerikanët, me sa shoh, përdorin vaksina të miratuara nga Agjencia Evropiane e Barnave,” tha ajo. “Kjo do të mundësojë lëvizjen e lirë dhe udhëtimin në Bashkimin Evropian. Sepse një gjë është e qartë: Të 27 vendet anëtare do të pranojnë, pa kushte, të gjithë ata që vaksinohen me vaksina të aprovuara nga EMA.”
EMA, rregullatori i barnave të bllokut, ka miratuar tre vaksinat që përdoren në Shtetet e Bashkuara – Moderna, Pfizer dhe Johnson & Johnson. Times tha se programi i shpejtë i vaksinimit i SH.B.A.-së dhe përparimi në bisedimet rreth mënyrës së përdorimit të çertifikatave të vaksinave, ishin prapa planit për të lejuar kthimin e udhëtimeve të kohës së lirë nga SH.B.A. në BE.
Von der Leyen tha se Shtetet e Bashkuara po bënin “përparim të madh” dhe vuri në dukje se ishte në rrugën e duhur për të vaksinuar 70 përqind të të rriturve nga mesi i Qershorit. Rifillimi i udhëtimit do të varet “nga situata epidemiologjike, por situata po përmirësohet në Shtetet e Bashkuara, pasi shpresojmë se po përmirësohet gjithashtu në Bashkimin Evropian”, shtoi ajo.
