Partitë shqiptare në Malin e Zi janë bashkuar për të dalë me një listë në zgjedhjet parlamentare që do të zhvillohen më 30 gusht.
Është kryetari i Forcës së re demokratike, Nazif Cungu, që bën me dije se partitë shqiptare kanë vendosur të bashkojnë forcat.
“Alternativa Shqiptare e kryesuar nga Nik Gjeloshaj, Forca e re demokratike e kryesuar nga Nazif Cungu, Lidhja Demokratike Shqiptare e kryesuar nga Nikollë Camaj, Unioni i Tuzit i kryesuar nga Fadil Kajoshaj dhe Levizja qytetare Perspektiva, e kryesuar nga Amir Hollaj, duke kuptuar rëndësinë e zgjedhjeve parlamentare të 30 gushtit, kërkesën e qytetarëve, pritjen dhe ftesën e diasporës për bashkim, kanë rënë dakord që, në zgjedhjet parlamentare të 30 gushtit, të dalin në një listë të përbashkët”, shprehet Cungu.
Ai thekson se “të bindur se një list është zgjedhja më e mirë, dhe me kërkesë të vëllezërve tonë nga diaspora, dhe insistimin e asamblistit të Nju Jorkut, Mark Gjonaj, që t’i japim mundësinë formimit të një liste të përbashkët, për të gjitha subjektet shqiptare, nënshkrimin e marrëveshjes, të paraparë për nesër në mesditë, kemi vendosur ta shtyjmë deri në momentin kur shpresat për një veprim të tillë të jenë shuar”.
30,439 shqiptarë etnikë jetojnë në Mal të Zi, që përbëjnë rreth 5% të popullsisë. Aktualisht në Parlamentin malazez është vetëm 1 deputet shqiptar për shkak të përçarjes së partive në vitin 2016. Me bashkimin në një listë të përbashkët, shqiptarët synojnë të arrijnë deri në 5 deputetë, duke u bërë faktor i rëndësishëm për zërin e shqiptarëve në Parlamentin me 81 deputetë.
