Bashkitë tona vendore po vijojnë të krijojnë borxhe dhe detyrime, teksa nuk bëjnë pagesat për investime, mallra dhe shërbime.
Në një raport të 6 mujorit të parë nga financat vendore, në fund të gjysmës së parë të vitit 2020, stoku i detyrimeve të prapambetura shënoi rreth 70 mln euro, ose 8.7 miliardë lekë. Një rritje me 7%, krahasuar me fundin e vitit 2019.
Rreth 52% e stokut të detyrimeve të prapambetura përfaqësohet nga investimet, ndërsa 22% janë mallra dhe shërbime. 14% nga vendime gjyqësore dhe 12% nga detyrime të tjera.
5 bashki mbajnë rreth 50% të stokut total të detyrimeve të prapambetura. Nivelin më të lartë e ka Bashkia e Tiranës, me rreth 1,9 miliardë lekë, ose 22.2% e stokut. Më pas ndiqet nga bashkia Vorë, me 711.7 milionë lekë, ose 8.4% e stokut.
Më tej vjen Bashkia Kavajë me 846 milionë lekë detyrime, ajo e Pogradecit me 404.5 milionë lekë dhe e Kamzës me 379.2 milionë lekë.
Ato që kanë shtuar më shumë borxhin krahasuar me 2019, janë bashkitë e Vorës, Tiraës, Kuçovës, Kavajës dhe Belshit.
Ndërkohë, bashkitë që kanë shlyer një pjesë të mirë të detyrimeve janë ato të Vlorës, Durrësit, Lezhës, Finiqit, Kukësit, Maliqit dhe Urës Vajgurore.
Zhvillimet në stokun e detyrimeve të prapambetura mund të përdoren si një sinjalizues i tërthortë i gjendjes financiare të bashkive, e cila aktualisht vlerësohet të jetë në kahun përkeqësues, thekson raporti.
Në kushtet kur burimet financiare në dispozicion përballen me një rënie të qenësishme vjetore dhe nevojat për shërbime janë intensifikuar nën presionin e pandemisë së COVID-19, bashkitë përballen me një efekt të tipit “gërshërë” – zgjerim të hendekut negativ mes të ardhurave dhe shpenzimeve, i cili për reflektohet në zgjerim të detyrimeve të prapambetura.
Në terma të menaxhimit financiar, situata paraqitet e vështirë dhe e brishtë njëkohësisht, element ky që kërkon vëmendje të shtuar nga qeveritë vendore për të evituar fundosjen e mëtejshme të bashkive në detyrime të prapambetura, paralajmëron raporti.
/GazetaReforma.com/
