Liderët shtetërorë të Kosovës dhe partnerët e koalicionit qeverisës, por edhe kryeministri, Edi Rama kanë darkuar mbrëmjen e kaluar së bashku.
Nga darka, ku përveç kryeministrit Rama, ishin edhe presidenti Hashim Thaçi, kryeministri Ramush Haradinaj, kryeparlamentari Kadri Veseli, së bashku me zëvendëskryeministrin Fatmir Limaj dhe ministrin e Punëve të Jashtme, Behgjet Pacolli.
Nga ky takim nuk janë bërë ende publike temat që janë diskutuar. Foton e takimit mes politikanëve e ka shpërndarë në “Instagram” djali i Hashmi Thaçi, Endriti. Mediat kosovare raportojnë se takimi mund të jetë bërë në shtëpinë e presidentit të Kosovës dhe këtë e bazojnë tek ambientet e shtëpisë.
Ndërsa, duke u bazuar në zhvillimet aktuale politike në Kosovë, nuk është e vështirë të konkludohet se temë bosht e takimit duhet të ketë qenë taksa ndaj Serbisë. Ky takim vjen në kohën kur raportet mes presidentit Thaçi dhe kryeministrit Haradinaj, janë në shkallën më të lartë të acarimit si pasojë e taksës së vënë ndaj mallrave të Serbisë, por edhe kundërshtimit nga kryeministri të idesë së presidentit Thaçi për ndryshim të kufijve të Kosovës.
Po ashtu, darka ka ndodhur një natë pas miratimit të buxhetit të Kosovës për vitin 2019 dhe votimit të Projektligjit për Dialogun.
Ndërkohë sot ka qarkulluar edhe një dokument i prezantuar nga kryeparlamentari Veseli, në të cilin parashihet pezullimi i taksës për 120 ditë dhe gjatë kësaj kohe Serbia duhet të plotësojë 10 kushte, raporton Telegraf.
Nuk dihet nëse Thaçi dhe Rama ia kanë dalë ta bindin kryeminsitrin Haradinaj ta heq ose pezullojë taksën ndaj mallrave të Serbisë, kur dihet se ky i fundit është kategorik që ajo të mbetet deri në njohjen e Kosovës nga Serbia.
