Nis dhënia me koncesion PPP e qyteteve. Shembulli i parë vjen nga Bashkia e Elbasanit. Këshilli i këtij qyteti më datë 30 shtator 2020 aprovoi vendimin mbi “Mbi miratimin në parim të fillimit të procedurave për dhënien me koncension/ partneritet publik privat të projektit “Rikualifikimi urban i infrastrukturës rrugore dhe rekreativiteti i blloqeve të banimit, në disa lagje të qytetit të Elbasanit, si propozim i kërkuar”.
Vendimi është marrë me propozim të kryetarit të bashkisë Gledis Llatja, dhe relacionit të dërguar nga Drejtoria e Planifikimit të Territorit dhe projekteve. Koncesioni është një vlerë prej 882 milionë lekësh që shteti do t’ia kalojë një kompanie private që është propozuese e projektit. Nuk dihet nëse banorët kanë qenë dakord, por ka pak gjasa që në takimet e iniciuara “Buxhet me pjesëmarrje” të jetë bërë i ditur ky koncension.
Janë të paktën 6 koncesione me partneritet publik privat që qeveria parashikon të japë për vitin e ardhshëm. Por një ndër ta është dhe dhënia me koncesion e qytetit të Elbasanit.
Deri më tani koncesioni është dëgjuar për shërbime të ndryshme, apo dhe për rrugë nacionale, për ndërtimin e shkollave, si e ka përdorur Erion Veliaj në Tiranë. Ky i Elbasanit është një rast i rrallë. Shuma e parashikuar, sipas relacionit të buxhetit të shtetit të vitit 2021 për këtë PPP shkon në 882,000,000 lekë.
Mësohet se përmes këtij fondi kompanisë fituese do t’i jepen disa rrugë, lulishte dhe fasada të pallateve. Elbasani prej 5 mandatesh drejtohet nga socialistët, por nuk ka arritur të rehabilitojë infrastrukturën, që tashmë do ta kalojë në PPP.
Vlera e 6 kontratave të reja koncesionare me Partneritet Publik-Privat për vitin 2021 është 217,5 miliardë lekë ose më shumë se 1,7 miliardë euro. Kontratat u njoftuan nga projektbuxheti i vitit 2021, i publikuar nga Ministria e Financave. Vlera më e madhe i takon koncesionit për segmentin Milot-Fier me një shumë prej 178 miliardë lekë. Projekte të tjera janë koncesioni i Aeroportit të Vlorës me vlerë prej 12 miliardë lekësh, ai i rritjes së sigurisë rrugore me vlerë 5 miliardë lekë; shërbimi i infrastrukturës së çelësave publik PKI me vlerë 208 milionë lekë.
/GazetaReforma.com/
