Ka përfunduar arratia e ish-efektivit të forcave RENEA, Altin Morina, i cili u arrestua mbrëmjen e djeshme nga shërbimet e Komisariatit nr. 2 në Tiranë, bashkë me një person tjetër.
Morina ishte shpallur në kërkim që nga maji i vitit 2024, në kuadër të operacionit Revanshi.
Sipas dosjes së SPAK, hetimet kanë nxjerrë prova që lidhin Morinën me Durim Bamin në organizimin e kultivimit të kanabisit në zonën e Niklës dhe Tapizës.
Morina, në atë kohë efektiv i forcave RENEA, dhe Bami dyshohet se kanë kultivuar bimë narkotike gjatë viteve 2019-2020.
Altin Morina ishte arrestuar më parë në mars të vitit 2023, kur iu gjetën 113 mijë euro në makinën e tij, por ai u lirua pas deklaratës se paratë ishin marrë hua për një problem personal.
Megjithatë, tashmë ai është rikthyer në qeli pas arrestimit të tij të fundit, ku iu gjet një armë zjarri dhe dokumente false.
