Lideri i Sirisë, Bashar al-Assad është betuar si president për të nisur mandatin e katërt shtatë vjeçar në Siri. Kjo vjen pas zgjedhjeve të muajit maj të cilat u cilësuan si të manipuluara nga opozita. Assadi gjatë fjalimit të tij iu bëri thirrje sirianëve që të kthehen në atdheun e tyre dhe gjithashtu falenderoi të gjithë ata që votuan për të.
“Ju vërtetuat me vetëdijen tuaj dhe lidhjen atdhetare që njerëzit nuk bëjnë kompromis me vendosmërinë e tyre për të mbrojtur të drejtat e tyre, pa marrë parasysh truqet e kolonialistëve”, tha ai.
Në zgjedhjet e 26 majit që u mbajtën në pjesën e shtetit të kontrolluar nga qeveria, Assadi fitoi 95,1% të votave, bazuar në rezultatet zyrtare. Sjellim në vëmendje se Siria është e mbërthyer nga një luftë civile që nga viti 2011 dhe gati gjysma e popullsisë të para luftës është zhvendosur ose ka ikur jashtë vendit. Gati gjysmë milionë njerëz janë vrarë dhe dhjetëra mijëra janë të zhdukur.
Sipas shifrave të Kombeve të Bashkuara, 80 për qind e popullatës jeton në varfëri. Inflacioni është I pandalshëm dhe valuta zyrtare e shtetit është duke pësuar rënie të thellë. Edhe pse luftimet janë pakësuar në muajt e fundit, rreth 40 për qind të vendit mbetet jashtë kontrollit qeveritar. Forca të huaja dhe forcat e mbështetura nga jashtë janë aktivë brenda kufijve të Sirisë. Qeveria e Assadit është e mbështetur nga Rusia dhe Irani, të dy këto shtete që kanë dërguar forca ushtarake dhe ndihma të tjera për të gjatë konfliktit. Assadi ka udhëhequr Sirinë nga viti 2000, pas vdekjes së babait të tij që e mori pushtetin përmes një grushteti në vitin 1970.
