Kryedemokrati Luzim Basha e ka nisur mëngjesin e sotëm me një premtim elektoral. Me anë të një postimi në rrejtin social Facebook, ai premtoi se sapo PD të vijë në pushtet do të mundësojë 110 mijë vende të reja pune për shqiptarët.
Sipas kryetarit të opozitës, rritja e punësimit është faktori kyç për stabilitetin ekonomik.
“Angazhimi i parë i programit tonë është minimumi 110,000 vende të reja pune për shqiptarët.
Krijimi i vendeve të punës është jetik për stabilitetin ekonomik dhe çelësi për njerëzit që të investojnë në veten e tyre dhe fëmijët e tyre.
Ka ardhur koha ta largojmë këtë qeveri dhe të sjellim një qeveri të re, që kujdeset për njerëzit e jo për veten e saj.
ShqiperiaFiton”, shkruan Basha.
Kujtojmë se prej disa ditësh, kryedemokrati ka propozuar planin e tij për të rimëkëmbur vendin duke u fokusuar në tre pika kryesore.
Një ndër to është dhe shëndetësia, të cilës Basha i ka dhënë theks të veçantë duke premtuar një cilësi më të mirë të ilaçeve me rimbursim dhe një menaxhim të ri të të gjithave spitaleve publike.
“Pacienti do të vendoset në qendër të sistemit sipas parimit “paraja ndjek pacientin.” Ju vetë do të zgjidhni mjekun e familjes, klinikën, apo spitalin ku doni të kuroheni.”, u shpreh Basha.
Gjithashtu nuk ka munguar dhe premtimi për mjekët dhe infermierët, për të cilët tha se rroga minimale do të jetë 700 dhe 1200 euro.
“Në programin tone Shqipëria fiton Shëndetësinë, paga e infermiereve do të behet 700 Euro dhe e mjekëve do te behet 1200 Euro. Në këto kohë të vështira ne e pamë, se pavarësisht se ishin lënë pas dore, ata ishin heronjtë tanë!”, deklaroi ai.
