Kreu i PD, Lulzim Basha ka vazhduar takimet e ditës së sotme në Përrenjas, ku ka premtuar sërish statusin e minatorit, premtim që e dha edhe ditën e djeshme në Dibër.Basha ka thënë se kur të vijë në pushtet do të hapi dyert e investimeve bashkë me Europën dhe Amerikën, duke bërë të mundur që vendi të ecë përparë.
“Energjia e ndryshimit e ka pushtuar Përrenjasin. Siç e thotë dhe kënga e fushatës energjia për ndryshim mbarë Shqipërisë është e pandalshme. Ndryshimi ju e dini që po vjen për ju. Beteja e 25 prillit po bëhet për njerëzit e thjeshtë të këtij vendi.
Na la në vend numëro aty ku ishim tetë vite më parë. premtoi hapjen e negociatave. Tetë vite hapi shampanjën për vete dhe hapi dyert për emigracionin. Tetë vite dështim dhe ja vjen të trokasë në derë dhe do edhe katër vite të tjera. As katër ditë, as katër orë më shumë, më 25 prill vjen dita dhe ora për ndryshim. Nuk është ditë e partive, por dita e popullit, kur ju i keni në dorë të gjithë politikanët. Do të vazhdojmë edhe katër vite si këto tetë vite apo do të votojmë për ndryshim. Minatorët shqiptarë do të kenë dinjitetin e plotë, statusin e minatorit. Sikundër bashkarisht me Europën dhe Amerikën do të hapin dyert e mbyllura të investimeve të huaja,për fermerët, studentët. Ne do të bëjmë të mundur që vendi ynë të bëjë përpara”, tha Basha.
Ai bëri thirrje që në 25 prill qytetarët të dalin masivisht në kutitë e votimit, pavarësisht nëse janë të djathtë apo të majtë e të votojnë të gjithë bashkë për ndryshimin.
“Më 25 prill të dalin pasivisht në kutitë e votimit. Të djathtë dhe të majtë, të gjithë bashkë për ndryshim. Ju do të votoni jo për partitë, por për veten tuaj. Votoni për Shqipërinë drejt Europës,” tha Basha.
