Partia Demokratike ka prezantuar ditën e sotme programin e saj për arsimin për zgjedhjet e 25 prillit. Kreu i PD, Lulzim Basha është shprehur se paga e mësuesve do të rritet me 60% duke bërë që snjë mësues të mos paguhet më pak se 700 euro në muaj. Basha gjithashtu ka thënë se do të jepen tekste shkollore falas për 350 mijë nxënës.
“Angazhohem se do të siguroj tekste shkollore të reja falas, për 350 000 nxënës. Po kështu fëmijët e të gjitha familjeve në nevojë do të përfitojnë paket shkollore dhe tekste falas gjatë gjithë arsimit parauniversitar. Nuk do të lëmë asnjë fëmijë pa ndihmuar. Angazhohem se do të hartojmë një program arsimor modern, përmes të cilit do t’u japim mundësinë të rinjve të Shqipërisë që duan një profesion, ta marrin atë gjatë periudhës së arsimit të tyre”, tha kryedemokrati Basha.
“Nëse fëmijët janë e ardhmja jonë, atëherë përgjegjësit për këtë të ardhme janë mësuesit e fëmijëve tanë. Ata meritojnë më shumë. Po ama vërtet më shumë. Dhe unë angazhohem që t’u jap më shumë. Ne do të rrisim me 60% pagat e mësuesve dhe as edhe një mësues nuk do të marrë më pak se 700 Euro në muaj rrogë. Kështu ne do sjellim më shumë të ardhura dhe mirëqenie për 35 000 familjet e mësuesve tanë të arsimit parauniversitar”, u shpreh kreu i PD.
Programi duket mjaft premtues në letër, por ende kreu i PD nuk ka bërë të ditur se si do i sigurojë paratë për zbatimin e tij. Ndonëse premtimet janë të shumta, Basha nuk ka dhënë ndonjë detaj për një plan ekonomik që do të rriste të ardhurat në buxhetin e shtetit dhe rishpërndarjen e drejtë të tij. Deri tani nuk është përmendur asnjëherë taksimi i oligarkëve si një mënyrë për të ndihmuar ekonominë, por gjithsesi jemi ende në pritje të ndonjë plani nga demokratët.
