Jemi vetëm 4 ditë larg datës së zgjedhjeve të 30 qershorit. Pak minuta më parë Partia Demokratike prezantoi strategjinë e saj për zgjedhjet, por edhe pas tyre.
Partia Demokratike ka bërë me dije se protestat do të shtrihen në të 61 bashkitë e vendit “në mbrojtje të demokracisë dhe rendit kushtetues dhe kundër farsës së votimeve të paligjshme”.
Ditën e sotme gjithashtu Këshilli i Europës ka vendosur të anulojë misionin e tij vëzhgues për zgjedhjet e 30 qershorit “për shkak të pasigurisë lidhur me organizimin e tyre dhe rrezikut të mundshëm të vendosjes në zona të ndryshme”.
Përmes një e-maili dërguar zyrës së Këshillit të Europës në Tiranë, ata konfirmojnë mos praninë e tyre në Shqipëri për zgjedhjet vendore. Lidhur me tërheqjen e Këshillit të Evropës, ai që ka reaguar është Lulzim Basha.
Kreu i PD-së ka thënë se edhe bota perëndimore e ka dhënë sinjalin e saj të parë që është i qartë dhe i prerë. Kjo pasi 30 qershori nuk është datë zgjedhjesh në Shqipëri.
Basha shprehet se pavarësisht ftesës së qeverisë, Këshilli i Europës ka vendosur të mos dërgojë delegacion vëzhgues për zgjedhjet.
“Sot bota perëndimore dha sinjalin e parë, të qartë dhe të prerë, se 30 Qershori nuk është ditë zgjedhjesh në Shqipëri. Vendimi i Kongresit të Autoriteteve Rajonale e Lokale të Këshillit të Europës për të anuluar dërgimin e Delegacionit Vëzhgues për farsën elektorale që po tenton të zhvillojë Edi Rama, është fakt kuptimplotë se në 30 Qershor nuk ka zgjedhje në Shqipëri.
Për herë të parë nga rënia e komunizmit, Këshilli i Evropës ka vendosur të mos dërgojë Delegacion Vëzhgues për zgjedhjet, pavarësisht ftesës që i ka bërë Qeveria shqiptare. Këtë vendim Këshilli i Evropës e ka marrë jo sepse ia ka kërkuar opozita, por sepse 30 Qershori nuk është ligjërisht ditë zgjedhjesh në Shqipëri.
Ky është një vendim qartësisht politik sepse është një tërheqje që Këshilli i Europës nuk e ka bërë as për zgjedhje të zhvilluara në zona konfliktesh të armatosura apo konflikti civil nga Ukraina në Gjeorgji nga Armenia dhe Azerbajxhani apo edhe gjatë konfliktit të armatosur në Maqedoni.
Duhet të mbahet parasysh se Këshilli i Europës është institucioni kryesor i monitorimit të zgjedhjeve vendore në Europë. Tërheqja e Këshillit të Europës, institucionit kryesor europian të mbrojtjes së të drejtave të njeriut dhe demokracisë, është distancim i qartë nga votimet farsë një-partiake, anti-demokratike dhe anti-kushtetuese që kërkon të bëjë Edi Rama”, tha Basha.
