Pas plotë katër muajsh protesta, situata mes banorëve të Astirit dhe policisë është acaruar së tepërmi. Po çfarë ka ndodhur?
Banorët janë shprehur se kanë marrë informacione se policia do bënte lëvizjen e radhës duke i arrestuar dhe për këtë arsye protesta e tyre ka zgjatur jo 1 orë siç edhe e kanë të përcaktuar, pra nga ora 17:00-18:00, mbrëmjen e sotme ka nisur në orën 18:00 dhe ka vazhduar ende pas orës 21:00.
Banorët janë shprehur se policia kishte marrë urdhër që të mësynte mbi banorët dhe pikërisht për këtë arsye kanë qenë të pranishme edhe Forcat e Ndërhyrjes së Shpejtë dhe me një thirrje, kreu i PD-së Lulzim Basha ka shkuar pranë banorëve.
Ai ka akuzuar kryeministrin dhe Ministrin e Brendshëm për terror.
“Kanë marrë urdhër për të shoqëruar në mënyrë të paligjshme banorët që kanë mbi katër muaj që protestojnë natë për natë për të mbrojtur banesat e tyre. Ky është informacioni i besueshëm, ka pasur urdhër politik të ardhur nga Sandër Lleshaj dhe ndoshta Edi Rama për të kryer akte reprezalje dhe terrori mbi banorët. Unë nuk kam burime, por interpretimi im është se bisha e plagosur bëhet më e rrezikshme në momentet e fundit, këta e kanë kuptuar se u ka ardhur fundi”, tha Basha.
https://www.facebook.com/partiademokratike/videos/1217293445114604/
