Ditën e sotme kryetari i PD, Lulzim Basha njoftoi mbledhjen e kryetarëve të degëve të PD në selinë blu. Ndërsa mësohet se momentalisht po zhvillohet mbledhja e planifikuar, ku kryedemokrati në fjalën e tij drejtuar kryetarëve të degëve ka theksuar se qëllimi kryesor ishte që partia Demokratike të dilte e bashkuar nga Kuvendi i lajmëruar nga ai vetë për t’u mbajtur më 18 dhjetor.
Ndër të tjera Basha u shpreh se beteja me njëro-tjetrin brenda partisë së PD nuk do i çonte asgjëkundi dhe vuri në dukje faktin se nga kjo gjendje përfitonte vetëm kryeministri Edi Rama.
“Rama është kundershtari yne i perbashket, pavarësisht cfare mendojmë në këtë situatë që po kalojmë. Beteja me njëri- tjetrin nuk na çon askund. I shërben vetëm Rames dhe patericave te tij, që po bëjnë gjithcka që beteja mes nesh të çojë në një ndarje të partisë. Ju jeni deshmitarë të kësaj “- tha Basha.
Gjithashtu Basha ngriti shqetësimin për qëndrimet antistatutore sipas tij të Sali Berishës. Basha tha se Berisha nuk njeh asnjë institucion të PD dhe as vendimmarrje.
Mes të tjerash Basha u shpreh i vendosur për të mos lejuar qe këto kushte te krijuara te çojnë PD në izolim.
“Kjo histori e përdorimit te demokratëve si mburoje e interesave personale te kujdo merr fund njehere e përgjithmonë. Kryesia e Partisë Demokratike votoi për mbledhjen e Kuvendit legjitim. Sali Berisha thotë se prapë nuk e njeh. Ku qëndron morali i statutit që me forcë ngre Sali Berisha? Çfarë po kërkon ai? Sali Berisha nuk e ka hallin te statuti Ai nuk njeh asnjë strukturë të Partisë, sepse qëllimi i tij është që partia të shndërrohet në një mburojë të tij përballë Shteteve të Bashkuara.”, -tha Basha.
Basha e përforcoi argumentin se Berisha e kishte justifikim nisjen e foltores me qëndrimin se vendimi për të nuk ishte marrë nga forumet. “Pse nuk e përmend më Sali Berisha faktin me të cilin nisi foltoren, sepse nuk u votua në Kryesi? Sepse ky ishte një justifikim. Ja ku është vendimi i Kryesisë me 28 vota pro për mbledhjen e Kuvendit, dhe ai përsëri thotë se njoh. Është e qartë se sido që të merrej ai vendim, me çfarëdo votimi, Sali Berisha dëshmon se nuk do ta njihte. Sepse sot ai nuk njeh asnjë organ zyrtar te PD.”, pohoi lideri demokrat.
