Ashtu si edhe ishte paralajmëruar, mesditën e sotme është zhvilluar mbledhja e thirrur nga kryedemokrati Basha, ku ishte mbledhur Këshilli Kombëtar i partisë dhe kandidatët e rinj për deputet.
Në njoftimin e nxjerrë mengjesin e sotëm, tema kryesore që do të trajtohej do të ishte ajo e protestës së 13 prillit dhe masat organizative që do të merreshin për të.
Pas përfundimit të mbledhjes Basha ka bërë një deklaratë, ku ka thënë se këtë herë pjesëmarrja do të jetë edhe më e madhe pasi sipas tij kanë të gjithë situatën në favor dhe de fakto është në shumicë.
Sipas kryedemokratit, PD-ja është në shumica ambsolute në çdo sondazh të pavarur, qofshin këto vendase apo të huaja.
“Për protestën e 13 Prillit duhet një organizim kapilar për ta pasur pjesëmarrjen edhe më të madhe se dy protestat e tjera kombëtare. Kemi të gjithë situatën në favor. Ne jemi de fakto shumicë. Që pas djegies së mandateve, PD ka një rritje të menjëhershme edhe mes të pavendosurve. Jemi shumicë absolute në çdo sondazh të pavarur vendas dhe të huaj. Duhet ta përkthejmë sa më shpejt në votë këtë mbështetje të shqiptarëve. Për këtë arsye, pjesëmarrja e lartë në protestë ka një rëndësi të jashtëzakonshme. Kërkesa jonë mbetet e pandryshueshme. Largimi i Edi Ramës dhe qeveria tranzitore. Të shpjegojmë kudo në çdo takim që ne jemi shumicë dhe duhet ta tregojmë këtë”, tha Basha.
