Më herët ditën e sotme, në një reagim në mediat sociale, Rama bëri me dije se investitorët besojnë tek Shqipëria dhe tek libri i llogarive të saj, duke iu përgjigjur të gjithë kritikëve se tregjet financiare janë shprehur se Shqipëria s’u thye nga tërmeti e s’u gjunjëzua nga Covidi, e në fund do dalë më i fortë nga të dyja.
Pas pretendimeve të kryeministrit ka reaguar edhe kreu i Partisë Demokratike, Lulzim Basha, i cili në një reagim në mediat sociale, shkruan se vendi është zhytur në borxhe dhe kryeministri merr borxh të ri.
Më tej, numri një i opozitës, Eurobondin e quan një barrë të re për vendin dhe bën thirrje për largimin e Ramës, pasi sipas tij ka ardhur koha për të larguar.
“Shqipëria e zhytur në borxhe kurse KM mburret se merr borxh të ri!!! Me nivel borxhi 74%, me detyrime të prapambetura 600 mln euro, me koncesione abuzive 2,2 mld euro dhe me krizën më të thellë ekonomike me rënie 9%, sot mburret se po i shton cdo shqiptari edhe një barrë të re! Ka ardhur koha për ta larguar RAMAVIRUSIN që e zhyti ekonominë në krizën më të thellë, që mbylli bizneset, shpunësoi e largoi shqiptarët. Ka ardhur koha për të parë përpara dhe për ta bërë Shqipërinë vend normal e të zhvilluar”, shkruan Basha.
Në datë 4 qershor Kuvendi miratoi ligjin për daljen në tregjet ndërkombëtare për eurobondin, ndërsa pas komunikimit me Presidentin Meta, ky i fundit e dekretoi menjëherë.
650 milionë euro është vlera që vendi ynë kërkon në tregjet ndërkombëtare në formën e eurobondit, 250 milionë euro për të financuar Eurobondin e marrë në vitin 2015, që ishte në vlerën e 450 milionë euro me normë interesi 5.75% dhe që i mbaron afati i shlyerjes në 12 nëntor 2020, ndërsa pjesa tjetër për tërmetin që goditi Shqipërinë vitin e kaluar dhe shpenzimet.
Shqipëria ka dalë në këto tregje për herë të parë në vitin 2010 kur mori 300 milionë euro dhe së fundmi në vitin 2018 qeveria doli përsëri në tregjet ndërkombëtare duke marrë një eurobond në vlerën e 500 milionë Eurove, me interes 3.55%.
