Mesa duket miratimi në Kuvend i ndryshimeve Kushtetuese, ka ngjallur shumë reagime dhe mesazhe me tone të ashpra mes presidentit Meta, kryeministrit Rama dhe kreut të Opozitës Bashës.
Këtë herë ka qenë kreu i PD, Lulzim Basha i cili ka reaguar në lidhje me ndryshimet kushtetuese të miratuara sot, në Kuvend.
Me një gjuhë të ashpër Basha akuzon kryeministrin Rama për krim kundër vendit dhe se pas zgjedhjeve vendi i tij do të jetë në burg. Basha thotë vetë Edi Rama do të mbajë përgjegjësi për prishjen dhe konfliktin e marrëveshjes së 14 janarit dhe 5 qershorit.
Më tej kryedemokrati thotë se Opozita e Bashkuar dhe Partia Demokratike do të vazhdojë me hallet dhe problemet e shqiptarëve që qeveria Rama i ka harruar për qëllime personale.
“Koston e konfliktit të krijuar me hedhjen në erë të marrëveshjes së 5 Qershorit dhe 14 Janarit, do ta mbash vetëm ti personalisht Edi Rama. Nëse mendon se me konfliktin e krijuar dhe me prishjen e stabilitetit demokratik të vendit, do të marrësh garanci për kokën tënde dhe të hajdutëve që të rrethojnë, po ta them prerë dhe shkurt: Vendi yt pas zgjedhjeve të reja është në burg, atje ku shkon çdo individ që me dashje kryen një krim kundër vendit dhe qytetarëve të tij. Partia Demokratike dhe Opozita e Bashkuar do të vazhdojnë të kenë në plan të parë, jo lojën tënde dhe të krimit që të drejton prej 22 vitesh në politikë, por hallet dhe problemet e shqiptarëve, që ti dhe Qeveria jote i kanë braktisur për hallet e tua personale”, shkruan Basha.
