Kryetari i Partisë Demokratike, Lulzim Basha ka dalë për herë të parë në një komunikatë publike pas përfundimit të procesit të votimit. Ajo që vihet re janë mbështetësit e kryedemokratit të cilët e presin me ovacione dhe me thirrjen në kor”Rama ka mbaruar punë”. Në fjalën e tij Basha tha se fitorja ishte e qartë për votuesit shqiptarë. Gjithashtu kreu i PD-së falenderoi të gjithë qytetarët shqiptarë që të zgjodhën të votonin për ndryshimin. Basha tha se vullneti i popullit është në kutitë e votimit dhe shprehu bindjen se komisionerët do ta mbyllin me suksese këtë proces.
“Faleminderit të gjithë qytetarëve shqiptarë që zgjodhën ndryshimin. Kjo është një fitore e qartë për popullin shqiptar, Për Aleancën për Ndryshim. Vullneti i popullit është në kutitë e votimit. Kam besim të plotë se numëruesit dhe komisionarët do ta mbyllin me sukses këtë proces. Siç kam edhe në fushatë, në fund të këtij procesi Shqipëria fiton.”, -tha Basha.
Kujtojmë se ditën e sotme kreu i Partisë Demokratike, ka qenë në disa qytete ku ka parë edhe nga afër procesin e votimit. Basha ishte në qytetin e Durrësit dhe atë të Elbasanit dy nga vendet të cilët janë cilësuar si vija e zjarrit. Kujtojmë se në përgjithësi procesi i votimit ka qenë i qetë, por ka pasur edhe disa incidente, duke filluar nga vonesat dhe mbylljet para kohe të procesit të votimit.
