Ditën e sotme kryedemokrati Lulzim Basha ka folur si kryeministër, duke treguar se çfarë do bënte nëse do kishte një pozicion të tillë në këtë situatë ku ndodhet vendi ynë.
Në një intervistë për “Vizion Plus”, Basha u shpreh se ai do kishte si prioritet sigurinë, testimin dhe ndihmën ekonomike.
“Do të zbatoja plotësisht protokollin e sigurisë për jetën e çdo qytetari. Do të urdhëroja menjeherë mbylljen e këtyre vatrave të infeksionit, do të vendosja mjaftueshëm para të cilat buxheti i ka, por do të duhet të shkojnë aty ku ka nevojë. Këtë po bën Kosova. Nuk ka nevojë të marrim shembuj të fryrë, këtë po bën Maqedonia e Veriut, këtë duhet të bëjë Shqiperia. Fondet janë të pamjaftueshme, mënyra e dhenies së tyre është e paqartë, kemi humbur tre javë, fillon prilli, shumica e familjeve kanë djegur rezervat e tyre, kanë djegur atë pak dhjamë që kishin ndaj duhet urgjentisht të veprohet. Nga ana tjetër të ndryshohet urgjentisht strategji sa i përket dedektimit, zbulimit duke rritur masivisht testimin, duke nisur me shtresat më të ekspozuara që janë shëndetësia, janë punonjësit e shtetit që janë në kontakt me njerëzit, policia, janë punonjësit e sektorit privat që janë ne kontakt me njerëzit që nga punonjësit e tregtisë, të supermarketeve, bukëpjekësit me të gjithë ata që janë në kontakt me njerëzit dhe duke e shtrirë atë dhe duke nisur procesin e gjurmimit.”, u shpreh Basha.
Po ashtu, Basha tha se ‘qeveria Rama’ nuk duhet të lëjë jashtë skemës së ndihmës ekonomike gazetarët dhe mediat të cilët po rrezikojnë jetën e tyre çdo ditë, me qëllim informimin e qytetarëve.
“Kam marrë informacion 48 orët e fundit që shumica e medias është detyruar të punojë tani me gjysëm kapaciteti, gjysma e punonjësve te medias janë dërguar ne shtepi pa paga dhe në raste të tjera ata qe mbahen aty mbahen me gjysëm page, në kohë lufte siç është kjo, ne kohë krize siç është kjo. Ua them me siguri qe informacionet që marrim janë që një një pjesë e madhe e mediave kanë shkurtuar përgjysem personelin apo edhe më shumë dhe kane shkurtuar pagat.Problemi që vjen me këtë është nëse fillojnë dhe mbyllen dritaret informative këtë pasoja do ta vuajnë qytetarët; mungesa e transparencës, mungesa e informacionit apo informacioni i njëanshëm është shume i dëmshëm në kohë krize. Kjo është ajo që dua të ngre.
Nuk ka media që i ka shpëtuar kësaj. Thirrja ime është që media të mos jetë jashtë vëmendjes dhe të ketë një mbështetje edhe për to; në veçanti për punonjësit e medias, për gazetarët, për operatorët.”
https://www.facebook.com/lulzimbasha.al/videos/1653063218193170/
Kujtojmë se qeveria shqiptare nuk ka parashikuar asnjë lloj mbështetjeje për median, e cila shumë shpejt mund të shkojë drejt një kolapsi total, në një kohë kur informacioni është i një rëndësie jetësore e po i shërben shqiptarëve brenda e jashtë vendit.
Vetë kryeministri Rama herë pas here në fjalimet e tij i bën thirrje medias të përhapë sa më shumë mesazhet e rëndësishme mbi masat e reja të ndërmarra, e megjithatë, po zgjedh të tregohet i verbër para problemeve që media po has në një kohë kaq kritike.
Në ditët e fundit nuk kanë munguar reagimet nga Unioni i Gazetarëve e Autoriteti i Medias Audiovizive që i kanë bërë thirrje qeverisë për të ndërhyrë me marrjen e masave për suport ekonomik për gaztearët e punonjësit e mediave, e megjithatë, thirrjet e tyre kanë përfunduar në vesh të shurdhër.
Koronavirusi ka infektuar mediat shqiptare e askush nuk po e vë ujin në zjarr
