Kryetari i PD-së, Lulzim Basha, ka reaguar ashpër ndaj kryeministrit Edi Rama. Ai e ka akuzuar atë se po iu fsheh shqiptarëve të vërtetën për pandeminë në vend.
Ai gjithashtu reagoi dhe ndaj “progresit në ekonomi dhe shëndetësi” që Kryeministri Rama dhe Ministrja e Shëndetësisë folën para mediave gjatë mesditës së sotme.
Në një deklaratë për mediat, kryedemokrati Basha theksoi se për gjendjen nga Covid-19 ka vetëm një fajtor, e ai është Edi Rama. Lideri opozitar nënvizoi se shumica e shqiptarëve nuk e do më Ramën, prandaj ai i përket të shkuarës.
Më tej, Basha deklaroi se shqiptarët do të kenë një kryeministër, që do të tregojë përgjegjshmëri dhe do të dërgojë paratë e shqiptarëve në xhepat e tyre e jo në xhepat e pak njerëzve.
“Le t’u drejtohemi shqiptarëve, ku është shëndetësia falas?!Pas tetë vitesh që e pretendoi, ku është?! Tirja është produkti i vetëm i Edi Ramës në tetë vite. Sepse Tirja është Edi Rama, të merr lekët dhe s’të jep bukën. Shqipëria sot është vendi me numrin më të lartë të infektimeve, me numrin më të lartë të vdekjeve për shkak të dështimeve të Edi Ramës. Prandaj nuk ia vlen të merremi me atë që pas 25 prillit është e shkuara. E rëndësishme është që si të dalim nga gropa ku e futi vendin Edi Rama, duke filluar nga stabilizimi i situatës. Rritja e rrogave të mjekëve dhe infermierëve që të ndalim largimin e tyre. “, deklaroi Basha.
