Kreu i Partisë Demokratike, Lulzim Basha ka thënë sërish se qeveria ka gënjyer për numrin e viktimave nga Covid-19. Basha tha se këtë gjë e konfirmon edhe raporti i Komisionit Europian, në të cilin thuhet se Shqipëria ka shtesën më të lartë të vdekjeve në Europë për vitin 2020.
Kreu i opozitës deklaroi gjithashtu se shifra të rreme janë dhënë edhe për numrin e vaksinimeve dhe kjo duket në diferencën e shifrave të raportuara nga qeveria dhe ato të raportuara nga entitete ndërkombëtare.
“Rendi i ditës së sotme, i cili ka në qendër marrëveshjen me Pfizer, vendos edhe njëherë pandeminë në qendër të debatit parlamentar, siç ka qenë në qendër të debatit edhe në familjet tuaja. Këto ditë është diskutuar në komisione, sigurisht nga përfaqësuesit e opozitës, për vaksinimin dhe diferencën mes shifrave të raportuara nga qeveria dhe ato të raportuara nga entitete ndërkombëtare. Dhe si në traditën më të keqe të kësaj qeverie, ajo që thuhet, nuk bëhet. Kjo nuk është hera e parë që ndodhë dhe as hera e parë që gënjejnë me pandeminë. Sepse qytetarët tashmë e dinë që kanë gënjyer për ndihmën ekonomike, që kanë gënjyer për rimbursimin e të prekurve nga Covid-19, që kanë gënjyer për tenderat abuziv në kohë pandemie, të mveshura me sekretin shtetëror, por, mbi të gjitha, që kanë gënjyer për numrin e jetëve të humbura. Këtë nuk e themi ne, paçka se e paralajmëruam. Këtë e konfirmon tashmë edhe raporti i Komisionit Europian, në të cilin njoftohet se Shqipëria ka shtesën më të lartë të vdekjeve në Europë për vitin 2020”, tha Basha.
