Në periudhën 15-25 Nëntor 2024, Datacentrum dhe Barometri – Euronews Albania realizuan një sondazh me 1000 qytetarë të Shqipërisë për të vlerësuar lidhjen e deputetëve aktualë të Parlamentit me qytetarët.
Rezultatet tregojnë një distancë të madhe mes deputetëve dhe popullatës: më shumë se gjysma e qytetarëve (53%) nuk e dinë emrin e deputetit të tyre.
Sondazhi zbulon gjithashtu se 74.7% e qytetarëve nuk janë kontaktuar nga deputetët para zgjedhjeve, ndërsa një numër edhe më i lartë, 84.6%, thonë se nuk kanë pasur asnjë kontakt pas zgjedhjeve.
Më shumë se gjysma e qytetarëve, 52.3% e atyre që i njohin deputetët e tyre, mendojnë se ata nuk janë aktivë në Parlament.
Po ashtu, një pjesë e madhe e qytetarëve e vlerësojnë se deputetët nuk i kanë mbajtur premtimet e dhëna gjatë fushatës elektorale.
Më shumë se gjysma e qytetarëve shprehen se nuk do t’i rivotonin deputetët aktualë në zgjedhjet e ardhshme.
Sipas sondazhit, 53.3% e qytetarëve mendojnë se partia që ata mbështesin nuk duhet t’i rikandidojë këta deputetë.
Po ashtu, 57.3% e qytetarëve thonë se nuk do t’i votonin nëse kandidatë për deputetë do të ishin të njëjtët emra.
Këto rezultate pasqyrojnë një nivel të lartë pakënaqësie dhe zhgënjimi nga deputetët aktualë.
