Në qytetin e Barit u përkujtua sot 34-vjetori i një prej ngjarjeve më simbolike në marrëdhëniet mes Shqipërisë dhe Italisë, mbërritja e anijes “Vlora” me rreth 20 mijë refugjatë shqiptarë në bord, më 8 gusht 1991.
Në këtë përvjetor, Bashkia e Barit organizoi një ceremoni për të nderuar këtë kapitull historik dhe për të promovuar integrimin. Gjatë aktivitetit, iu dha nënshtetësia italiane një çifti shqiptar, Astrit dhe Daniela Nasufi, të cilët ishin vendosur në Bari disa vite pas ngjarjes së anijes “Vlora”.
Kryebashkiaku i Barit, Vito Leccese, theksoi rëndësinë simbolike të këtij akti pikërisht në këtë ditë historike: “Astriti dhe Daniela u zhvendosën në Bari disa vjet pas mbërritjes së anijes Vlora dhe sot ata bëhen qytetarë të plotë italianë, duke përmbushur një ëndërr të ndërtuar mbi punë të palodhur dhe sakrificë, pa harruar origjinën e tyre shqiptare. Në Bari, askush nuk është i huaj, siç themi shpesh, dhe pikërisht atë 8 gusht 1991, banorët e Barit e demonstruan këtë me akte solidariteti dhe gjeste spontane mirëseardhjeje, duke demonstruar konkretisht vlerat thelbësore të identitetit tonë, pavarësisht qëndrimeve të qeverisë qendrore, e cila iu përgjigj ngjarjes me një operacion policor. Ne i shprehim mbështetjen tonë të përzemërt Danielës dhe Astritit, duke i mirëpritur zyrtarisht në komunitetin tonë sot, ndërsa ata festojnë 22-vjetorin e martesës së tyre.”
Ceremonia shërbeu gjithashtu si platformë për thellimin e marrëdhënieve mes dy qyteteve që lidhen nga historia dhe diaspora shqiptare.
Në këtë kuadër, u nënshkrua një letër qëllimi mes kryebashkiakut të Barit dhe atij të Vlorës, me synimin për të formalizuar një marrëveshje binjakëzimi mes dy qyteteve.
Data për nënshkrimin zyrtar të marrëveshjes së binjakëzimit do të shpallet në vijim, ndërsa kujtimi i eksodit të vitit 1991 vijon të mbetet një pikë referimi e fuqishme në raportet mes dy brigjeve të Adriatikut.
