Kreu i Grupit Parlamentar të Partisë Demokratike, Gazment Bardhi, ka bërë publike pjesë nga dosja e Prokurorisë së Posaçme që lidhet me zv kryeministren Belinda Balluku, ku sipas tij evidentohet intimidimi i dëshmitarëve gjatë hetimit.
Bardhi deklaron se rreziku i presionit ndaj dëshmitarëve dhe i prishjes së provave është arsyeja pse legjislacioni parashikon masa sigurimi. Ai thekson se SPAK, përmes metodave speciale të hetimit, ka arritur të provojë se Belinda Balluku ka ushtruar presion ndaj personave të përfshirë në procedim.
“Në vijim të hetimit me metoda speciale ka rezultuar se nga ana e të pandehurës Belinda Balluku, gjatë kohës që ajo është njohur me akuzën nga organi i procedurës dhe ushtronte detyrën si zv kryeministre dhe ministre e Infrastrukturës dhe Energjisë, ka ushtruar presion me forma të ndryshme ndaj personit të pyetur në këtë procedim, konkretisht shtetases M.K., vartëse e saj”, thuhet në një pasazh të dosjes hetimore dhe në materialin që SPAK i ka dërguar Kuvendit në kuadër të kërkesës për heqjen e imunitetit, si argument shtesë.
Në një reagim publik, Bardhi shkruan se provat ekzistojnë dhe janë dorëzuar edhe në Kuvend, por sipas tij janë mbajtur të fshehura. “Provat ekzistojnë, madje janë sjellë edhe në Kuvend, por Niko Peleshi i ka mbyllur në kasafortë”, shprehet ai, duke e cilësuar fshehjen e fakteve dhe zvarritjen e çështjes si manovra të dëshpëruara të kryeministrit Edi Rama për të fituar kohë.
Sipas Bardhit, çdo minutë që Belinda Balluku vijon të qëndrojë në detyrë përbën një vendim të drejtpërdrejtë politik të kryeministrit, i marrë jo në funksion të interesit publik, por për mbrojtjen e vetes.
Në përfundim, kreu i grupit parlamentar të PD thekson se kryeministri nuk ka më rrugëdalje politike dhe duhet të bëjë një zgjedhje të qartë. “Të dorëzojë të pandehurën Belinda Balluku para drejtësisë ose të mbajë përgjegjësi për pengimin e drejtësisë”.
