Barcelona, Juventus dhe Real Madrid janë tre klubet e vetme që kanë mbetur në projektin afatshkurtër të Seperligës Europiane. Ekipet nuk kanë hequr dorë nga projekti, pavarësisht paralajmërimeve të UEFA-s dhe kanë deklaruar fitoren më të fundit ndaj qeverisë europiane të futbollit.
Në një deklaratë të përbashkët, klubet kërkojnë që UEFA të ndalojë procedimet disiplinore dhe të heqë gjobat e vendosura. Ato thonë se rasti do të shqyrtohet tashmë në Gjykatën e Drejtësisë së Bashkimit Europian, që do të rishikojë pozicionin monopol që UEFA mban në futbollin europian.
Deklarata e plotë:
“Barcelona, Juventus dhe Real Madrid CF shprehin miratimin e tyre me vendimin gjyqësor të miratuar sot, duke urdhëruar UEFA të revokojë, me efekt të menjëhershëm, të gjitha veprimet e saj kundër klubeve themeluese të Super League të Europës, duke përfshirë regjistrimin përfundimtar të dosjes disiplinore me procedurat e hapura për tre klubet e lartpërmendura dhe për të anuluar gjobat dhe kufizimet e tjera që u vendosën nëntë klubeve të tjera themeluese, si kusht që ata të mos i nënshtrohen procedurave disiplinore nga UEFA.
Në këtë mënyrë, gjykatat përsëri mbështesin pozicionin e promovuesve të Superligës Europiane dhe hedhin poshtë ankesën e ngritur nga UEFA, duke konfirmuar paralajmërimin për këtë të fundit se mosrespektimi i kësaj rezolute mund të çojë në sanksione financiare dhe përgjegjësi penale. Rasti do të shqyrtohet nga Gjykata e Drejtësisë e Bashkimit Europian në Luksemburg, e cila do të rishikojë pozicionin monopol që UEFA mban mbi futbollin evropian.
Ne kemi për detyrë t’i adresojmë sfidat me të cilat përballet futbolli. UEFA ka marrë rolin, ekskluzivisht, të rregullatorit, operatorit dhe pronarit të vetëm dhe menaxherit të garave europiane të futbollit. Ky pozicion monopol, në konflikt interesi, minon seriozisht futbollin dhe konkurrencën e tij. Siç është treguar në shumë raste, kontrollet financiare janë të papërshtatshme dhe nuk janë aplikuar në mënyrë objektive. Klubet që marrin pjesë në garat evropiane kanë të drejtë të qeverisin garat e tyre.
Ne jemi të kënaqur të dimë se, tani e tutje, nuk do t’i nënshtrohemi kërcënimeve të vazhdueshme nga UEFA. Ne mbetemi të përkushtuar ndaj objektivit të zhvillimit të projektit të Superligës Evropiane në një mënyrë konstruktive dhe mbështetëse, duke marrë parasysh tifozët, lojtarët, trajnerë, klube, liga dhe shoqata dhe federata kombëtare dhe ndërkombëtare. Ne jemi të vetëdijshëm se ka elementë të propozimit tonë që duhet të rishikohen dhe, natyrisht, të përmirësohen përmes dialogut dhe konsensusit. Ne vazhdojmë të besojmë në suksesin e një projekti që do të jetë gjithmonë respektuese me rregulloret e Bashkimit Evropian.
