Një banor i fshatit Mërqi në Fushë-Krujë, ka denoncuar skandalin me komisionerët për vlerësimin e dëmeve të tërmetit.
Në një prononcim për Ora News, ai akuzon komisionerin se kishte ardhur i dehur.
Banori u shpreh se shtëpia e tij është e pabanueshme, ndërsa komisioneri i kishte thënë se nuk ka problem.
“Janë çarë komplet, është e banueshme. Si është e banueshme i thashë, kësaj sikur gjysma e atij që ka rënë të bjerë e rrëzon për tokë. Fola unë me tërmetin tha. Ai kishte qenë i dehur”, u shpreh banori.
Prej gati një muaji, familja e Mark Troksit jeton në një çadër në oborrin e banesës, ku kanë frikë të futen brenda, pasi muret janë çarë.
Për ta nata e djeshme ishte më e vështira, për shkak të daljes nga shtrati të lumit Ishëm, si pasojë e reshjeve.
E njëjta problematikë evidentohet edhe në Fushë-Mamurras.
Familjet këtu nuk pranojnë të largohen nga shtëpitë, për shkak të bagëtive që janë pasuria e vetme për ta.
