Pasditen e sotme kanë vijuar sërish përplasjet me banorëve të fshatit Lumas me policinë dhe punonjës të firmës “Salillari”. Pavarësisht vendimit të marrë nga ADZM e Elbasanit , firma as nuk ka tentuar që të ndërpresë punimet në zonë dhe nu ki ka tërhequr mjetet duke vijuar punën mbi Sinec.
Banorët kanë kërkuar sërish ndalimin e punimeve dhe përplasjet me policinë nuk kanë munguar edhe këtë herë. Policia madje ka hedhur edhe gaz lotsjellës në mënyrë që të shpërndajë banorët.
“Policia sot na ka dhunuar. Ne po rrinim, se jemi moshë e moshuar. Ne po rrinim në hije te rrapi dhe na hodhën gaz. Filloi skrepi që të punojë dhe ne reaguam. Na hodhën gaz dhe lëndë djegëse”, dëgjohet një prej banoreve të thotë për Syri Tv.
Banorë të tjerë janë shprehur se protesta e tyre do të vazhdojë edhe me grevë urie, derisa punimet të pezullohen
Tashmë bëhen tre muaj që banorët e Lumasit protestojnë kundër ndërhyrjes në zonën e Sinecit, që është edhe territor i shpallur “Monument Natyror”. Agjencia Kombëtare e Zonave të Mbrojtura urdhëroi Bashkinë e Kuçovës dhe firmën “Salillari” përmes një shkrese, që të ndërpresin menjëherë punimët, por diçka e tillë as nuk është marrë parasysh.
Firma i ndali punimet vetëm për një ditë, por siç ka ndodhur që prej fillimit, me mbështetjen edhe të Policisë së Beratit, ato kanë rifilluar sërish.
