Banorët e Himarës, të mbështetur nga aktivistë mjedisorë, janë ngritur sërish në protestë për të kundërshtuar projektin e ujësjellësit që po zbatohet në shtratin e lumit Vjosë, brenda një zone të mbrojtur që përbën një nga ekosistemet më të rëndësishme në Evropë.
Pavarësisht paralajmërimeve të vazhdueshme për dëmin që mund të shkaktohet në natyrë, kompania kontraktuese ka vijuar me vendosjen e tubacioneve, duke injoruar reagimet nga komuniteti dhe organizatat e mbrojtjes së mjedisit. Protestuesit shprehen të alarmuar për pasojat që mund të ketë ndërhyrja në një prej lumenjve të fundit të egër në kontinent, si dhe për jetesën e 37 fshatrave që varen nga ky burim jetik.
Një tjetër shqetësim i ngritur me forcë nga banorët është indiferenca e përfaqësuesve politikë të zonës. Ata akuzojnë deputetët e qarkut për mungesë reagimi dhe për shmangie të qëllimshme nga përballja me komunitetin.
“Ku janë deputetët tanë? Ata duhet të ishin këtu me ne, por nuk kanë guxim të na përballen. Uji është i përbashkët, nuk ka ngjyrë politike,” thanë protestuesit, të zhgënjyer nga heshtja e politikës.
Me këtë protestë, ata kërkojnë ndalimin e menjëhershëm të punimeve dhe nisjen e një dialogu real për gjetjen e një zgjidhjeje që mbron mjedisin, jetesën dhe trashëgiminë natyrore të Vjosës një thirrje për ndërgjegjësim dhe veprim përpara se të jetë tepër vonë.
