Banorët e lagjes “5 Majit” në Tiranë, të prekur nga projekti i rindërtimit kanë zhvilluar një protestë tjetër, kësaj here te ish-sheshi Shqiponja. Banorëve të “5 Majit” iu janë bashkuar edhe banorët e Laprakës.
E pranishme në protestë ishte edhe nënë Liza, që u shndërrua simbol i protestës së ‘5 Majit’. Banorët dolën në protestë së bashku me fëmijët e tyre.
Efektivët e policisë kanë mbërritur tek ish-sheshi ‘Shqiponja, aty ku po zhvillohet protesta, duke qenë se qytetarët kanë bllokuar trafikun në zonë.
Ata kanë kërkuar që gjithçka të bëhet transparentë dhe të dokumentohet përmes noterizimit, hapësira e banimit dhe koha se kur ata do të marrin shtëpitë e reja, pasi ata kanë theksuar se nuk kanë asnjë informacion.
Kujtojmë që më herët disa prej banorëve në lagjen “5 Maji” në Tiranë të cilat janë prekur nga aksioni i IKMT për të shembur godina në kuadër të procesit të rindërtimit e kanë kaluar jashtë mbrëmjen e djeshme.
Ata janë shprehur se nuk do të largohen derisa të marrin banesë me të drejta të plota pronësie dhe refuzojnë të futen në banesa sociale.
Banorët shprehen se do t’i mbrojnë me gjak shtëpitë e tyre dhe që qeveria dhe institucionet përkatëse të mos i marrin të mirëqene se ato janë të urtë dhe do t’i pranojnë padrejtësitë pa vepruar.
