Në Gjykatën e Juridiksionit të Përgjithshëm të Apelit në Tiranë po zhvillohet seanca për shqyrtimin e masave të sigurisë ndaj të arrestuarve në çështjen e evazionit fiskal të kompanisë së naftës “Bankers Petroleum”.
Të arrestuarit kanë kundërshtuar masat e vendosura nga Gjykata e Fierit më 5 korrik, duke kërkuar lehtësim të tyre. Mes tyre janë drejtori i përgjithshëm i kompanisë, shtetasi kinez Hong Ping Xiao dhe ish-drejtori Leonidha Çobo, të cilët ndodhen në “arrest me burg”. Pesë persona të tjerë janë vendosur në “arrest shtëpie”, ndërsa tre të tjerë në “detyrim paraqitjeje” dhe me ndalim daljeje nga territori shqiptar.
Për shkak të numrit të lartë të të ndaluarve që kanë apeluar, seanca pritet të zgjasë gjatë gjithë ditës. Të akuzuarit pretendojnë se nuk kanë lidhje me veprat penale për të cilat po hetohen dhe kërkojnë masa më të lehta sigurie.
Në total, Gjykata e Fierit kishte lëshuar 14 masa sigurie, prej të cilave 10 janë ekzekutuar, ndërsa katër persona të tjerë ndodhen ende në kërkim.
Hetimet për këtë çështje janë kryer nga Prokuroria e Fierit në bashkëpunim me strukturat tatimore dhe ato të policisë. Ato fokusohen në dyshime për deklarime të rreme tatimore dhe shmangie të detyrimeve fiskale në përmasa të mëdha.
Prokuroria ka ngritur pesë akuza:
• “Krijimi i skemave mashtruese lidhur me TVSH-në”,
• “Fshehje e të ardhurave”,
• “Pastrim i produkteve të veprës penale”,
• “Shpërdorim detyre”,
• “Moskryerje e detyrave nga organet tatimore”.
Sipas organit të akuzës, kompania “Bankers Petroleum”, e cila operon prej më shumë se dy dekadash në zonën e Patos-Marinzës, ka ndërtuar një skemë për të shmangur detyrimet tatimore. Gjatë 20 viteve aktivitet, kompania ka deklaruar se ka funksionuar me humbje, në një shumë prej 11.7 miliardë lekësh, ndërkohë që ka eksportuar apo shitur naftë në vlerën e 532 miliardë lekëve.
Përmes kësaj skeme, jo vetëm që i janë shmangur detyrimeve ndaj shtetit, por kompania ka përfituar edhe rimbursime të padrejta të TVSH-së për një periudhë shumëvjeçare.
