Sektori bankar ka arritur të përmirësojë bazën e vet të të ardhurave në gjysmën e parë të këtij viti, duke tejkaluar edhe nivelet e parakrizës. Të dhënat e Bankës së Shqipërisë tregojnë se qoftë të ardhurat neto nga interesat, ashtu edhe ato nga komisionet dhe tarifat kanë kaluar nivelet e vitit 2019, para se ekonomia dhe sistemi financiar të vuanin efektet e pandemisë.
Për gjysmën e parë të vitit 2020, të ardhurat neto të sektorit bankar nga interesat arritën vlerën e 22.4 miliardë lekëve, në rritje me 8.2% krahasuar me të njëjtën periudhë të vitit të kaluar dhe me 9.3% krahasuar me të njëjtën periudhë të vitit 2019.
Rritja në këtë zë ka ardhur paralelisht si nga zgjerimi i të ardhurave nga interesat, ashtu edhe nga ulja e shpenzimeve për interesa. Të ardhurat nga interesat arritën në 25.9 miliardë lekë, në rritje me afërsisht 5% krahasuar me dy vitet e mëparshme. Kjo duket se zgjeron vijimin e zgjerimit të aktiveve të sektorit dhe sidomos të portofolit të kredisë.
Nga ana tjetër, shpenzimet për interesa vazhduan rënien, në më pak se 3.6 miliardë lekë, pothuajse 11% më pak krahasuar me të njëjtën periudhë të vitit të kaluar. Pavarësisht se kursimet në banka janë rritur me ritme të larta pas pandemisë, ato kanë vijuar tendencën e zhvendosjes drejt llogarive rrjedhëse dhe depozitave pa afat, ku normat e interesit janë shumë afër zeros. Ky fenomen po sjell uljen graduale, vit pas viti, të shpenzimeve për interesa të bankave tregtare, shkruan Monitor.
Edhe më domethënëse është rritja e të ardhurave nga tarifat dhe komisionet. Ato ishin më të prekurat nga periudha e mbylljes së ekonomisë, për shkak të kufizimeve dhe rënies së volumit të aktivitetit të biznesit në tërësi. Për 6-mujorin 2020, të ardhurat nga komisionet arritën në 6.2 miliardë lekë, me një rritje prej 22% krahasuar me 6-mujorin 2020 dhe 17% krahasuar me të njëjtën periudhë të vitit 2019. Duke përjashtuar rënien e vitit të kaluar, e kushtëzuar nga pandemia, të ardhurat e sektorit bankar nga komisionet kanë një tendencë të dukshme në rritje në dekadën e fundit. Kjo ka ardhur nga shtimi i përdorimit të shërbimeve bankare, por edhe nga rritja e vlerës së komisioneve.
Përmirësimi i të ardhurave ndikoi në rritjen e të ndjeshme të fitimi të sektorit bankar, që për 6-mujorin e këtij viti arriti vlerën e 10.5 miliardë lekëve. Fitimi i sektorit bankar (sipas standardeve të mbikëqyrjes së Bankës së Shqipërisë) u rrit me 47% krahasuar me vitin e kaluar dhe arriti afërsisht në të njëjtin nivel me 6-mujori e parë të vitit 2019. Veç rritjes së të ardhurave, ky rezultat u ndikua edhe nga ulja e shpenzimeve për fondin rezervë të kredive me probleme. Kjo reflekton kryesisht përmirësimet në cilësinë e portofolit të kredisë. /MONITOR
