Ditën e sotme janë publikuar në Fletoren Zyrtare hartat me tre zonat e reja në bashkitë ku do të rindërtohen banesat e dëmtuara nga tërmeti i 26 nëntorit.
Konkretisht bëhet fjalë për banesat në zonën e Shijakut, Laçit dhe Thumanës.
Njësia zbatuese për rindërtimin dhe rikonstruksionin e infrastrukturës publike në Shijak dhe në Thumanë do jetë Fondi Shqiptar i Zhvillimit, ndërsa për Laçin do të jetë Enti Kombëtar i Banesave, pasi 500 banesat do të ndërtohen nga qeveria turke.
Po ashtu, është planifikuar ndërtimi i lagjeve të reja edhe në Durrës dhe në Tiranë për strehimin e banorëve që mbetën jashtë nga tërmeti.
Kryeministri Edi Rama deklaroi pak ditë më parë se fatura e dëmeve nga tërmeti është 1 miliard euro.
Ndërkohë, Edi Rama ka zhvilluar disa takime me krerët e shteteve europiane, lidhur me ndihmat që ata do japin për dëmet e tërmetit.
Konferenca e Donatorëve do mbahet më 17 shkurt në Bruksel.
