Autoritetet spanjolle arrestuan këtë javë 10 të dyshuar të përfshirë në një bandë që përdorte veshjet elitare të Policisë për të kryer krime. Të armatosur rëndë, ata hiqeshin si policë për të befasuar tregtarët e drogës dhe më pas për të vjedhur dërgesat e drogës. Operacioni për kapjen e kriminelëve, i quajtur “Sirena 21”, përfshiu Policinë Kombëtare Spanjolle dhe Gardën Civile, të cilët arritën të çmontonin një grup që vepronte si oficerë policie, kryesisht në rajonin e Andaluzisë, në jug të vendit.
Grupi praktikoi atë që spanjollët e quajnë “vuelco” (kthesë, në përkthim fjalë për fjalë). Në gjuhën policore, termi përdoret kur kriminelët maskohen me veshje policie për të mashtruar kriminelët e tjerë. Specialiteti i të arrestuarve me operacionin “Sirena 21” ishte mashtrimi i grupeve të trafikut të drogës dhe konfiskimi i ngarkesave të drogës. 8 burra, mes tyre Ferdinand Dervishaj/Doda dhe 2 gra u arrestuan me 70 kilogramë lëndë narkotike, 5 makina, shumë armë dhe municione, përveç dokumenteve false.
Operacioni filloi bazuar në informacione që tregonin se një rrjet kriminal, i bazuar kryesisht në bregun perëndimor të provincës së Málaga dhe me degë në Cádiz, po praktikonte “vuelcos” duke synuar kryesisht trafikantët e drogës. Hetimi për bandën filloi në qershor 2021.
Armët e luftës
Grupi shquhej për veprimet e tij jashtëzakonisht të dhunshme, duke u drejtuar nga një shtetas shqiptar, i cili organizonte sulme me armë lufte. Kreu i bandës ishte i persekutuar prej disa kohësh, por ai gjithmonë ndryshonte identitetin e tij, duke përdorur dokumente false të kombësive të ndryshme, duke ndryshuar shpeshherë pamjen fizike, gjë që i lehtësonte lëvizjet pa tërhequr vëmendjen e Policisë.
Të arrestuarit do të gjykohen për formim bande, trafik droge, ndër të tjera krime./Rfi.fr
