Gazetari Almer Toska ka depozituar një kallëzim penal në SPAK ndaj zëvendëskryeministres dhe ministres së Infrastrukturës dhe Energjisë Belinda Balluku, vartësve të saj Gentian Gjyli dhe Ervis Berberi, si edhe ndaj kompanisë Gjoka Konstruksion. Sipas gazetarit, ekzistojnë prova që tuneli i Murrizit në Rruga e Arbrit është hapur për qarkullim pa u kolauduar, duke vënë në rrezik jetën e qytetarëve.
Në një prononcim për mediat jashtë ambienteve të SPAK, Toska u shpreh se hapja e tunelit është bërë pa respektuar procedurat ligjore dhe standardet teknike të sigurisë. Sipas tij, kompania ndërtuese nuk ka kryer kolaudimin teknik dhe nuk ka lëshuar certifikatën e përdorimit të tunelit.
“Tuneli i Murrizit u hap për qëllime politike në mars 2025 dhe nuk është kolauduar nga ARRSH. Jeta e qytetarëve është e rrezikuar çdo ditë. Por Balluku me drejtoreshat e saj e hapën për qëllime elektorale.
Kompania Gjoka Konstruksion ka shkelur nenin 199, 289 të Kodit Penal pasi nuk ka kryer kolaudim teknik, nuk është lëshuar certifikata e përdorimit, nuk janë verifikuar standardet teknike.
Pra lidhur me këto fakte, ne i kemi paraqitur SPAK këtë kallëzim penal për Belinda Ballukun, Gentian Gjylin dhe Ervis Berberin si persona kyç që në kundërshtim me ligjin kanë shpërdoruar detyrën.
Unë besoj që Klodian Braho dhe prokurorët e SPAK do t’i shtojnë një akuzë tjetër Belinda Ballukut”, tha gazetari Toska.
Kallëzimi penal lidhet edhe me problematikat e shfaqura së fundmi në tunelin e Murrizit, i cili vetëm pak ditë pas përfundimit të punimeve dhe hapjes për qarkullim ka pësuar plasaritje dhe çarje në muret e betonit. Pavarësisht se përdoret çdo ditë nga qindra automjete dhe mijëra qytetarë, ARRSH ka pranuar se tuneli nuk ishte kolauduar në momentin e hapjes, duke ngritur shqetësime serioze për sigurinë e tij dhe përgjegjësinë institucionale.
