Prej ditësh qeveria ka nisur riatdhesimin e shqiptarëve të mbetur jashtë territorit pas mbylljes së kufijve për shkak të pandemisë.
Fillimisht çdo emigrant që dëshiron të kthehet në atdhe duhet të rezervojë për 14 ditë hotelin në Shqipëri dhe pasi është bërë rezervimi i hotelit, qytetari do të marrë një kod personal dhe përmes këtij kodi do të hyjë sërish në faqen e “Air Albania” ku do të bëjë dhe aplikimin dhe për biletën e ardhjes.
Në karantinë në Durrës qëndrojnë për 14 ditë, ku 2/3 e shpenzimeve i paguan shteti, ndërsa qytetarët do të paguajnë 100 euro biletën dhe cdo ditë nga 7 euro për qëndrimin në hotel.
Mirëpo, kjo procedurë nuk i përfshinka të gjithë personat sepse ministrja e Infrastrukturës Belinda Balluku është shprehur sonte në “Opinion”, se dy kategori njerëzish mund t’i shpëtojnë karantinimit në hotel.
Balluku tha se të sëmurët dhe për minorenët mund të shkojnë në shtëpi.
“Vetëm nëse personi që vjen është i sëmurë dhe nuk kujdeset dot për veten e tij, mund të shkojë në shtëpi dhe të izolohen krejtësisht si familje. Rasti tjetër janë minorenët, ata dërgohen në familjen e tyre dhe sërish karantinohen si familje,“- tha Balluku.
Më pas, Balluku ka shpjeguar vijimin e procesit të riatdhesimeve për të gjithë qytetarët shqiptarë që kanë mbetur jashtë dhe linjat e tjera nga të cilat do të kryhen fluturimet.
“Deri në datën 26 do kemi edhe 660 qytetarë që kthehen duke e çuar numrin në rreth 1500 qytetarë, brenda 8 ditëve në 14 fluturime. Parisi është një destinacion që i ka vendet e ezauruara. Londra po përgatitet për flurturimin e dytë pasi fluturimi i parë është kthyer sot. Madridi është një destinacion që do të kryhet gjatë javës së ardhshme. Ndërkohë është futur Bukureshti që nuk e kemi diskutuar, por kërkesa ka qenë e madhe si dhe Vjena të cilën e deklaroj, pasi leja është e marrë”.
