Ish kandidati për deputet i Partisë Demokratike në listën e hapur për qarkun e Durrësit, Aulon Kalaja, deklaroi se zv.kryeministrja Belinda Balluku pritet të arrestohet shumë shpejt, duke iu referuar praktikës së ndjekur nga Prokuroria e Posaçme.
I ftuar në emisionin “Oponencë”, Kalaja u shpreh se, sipas tij, mënyra si po zhvillohet kjo çështje tregon qartë drejtimin që do të marrë hetimi. Ai theksoi se ajo që bie më shumë në sy është mbrojtja publike që kryeministri Edi Rama po i bën Ballukut.
“Për cilin nga emrat në PS, Rama e ka bërë këtë mbrojtje? Për asnjë”, tha Kalaja.
Sipas tij, kryeministri ka ndryshuar rolin e tij publik, duke kaluar nga mësues vizatimi në avokat të vartëses së tij. “A ka mbrojtur ndonjë nga të vetët si Belinda Ballukun? Këta janë si vëllezërit siamezë. Ata po bien bashkë, këtë moment duhet të shfrytëzojë PD”, u shpreh Kalaja.
Ai shtoi se brenda Partisë Demokratike duhet të ketë më shumë seriozitet dhe theksoi se ka paraqitur kërkesë në mbledhjen e Këshillit Kombëtar të PD për pastrimin e partisë. “Përveç asaj që është thënë në media, unë kam paraqitur kërkesën time në mbledhjen e Këshillit Kombëtar të PD për pastrimin e PD”, tha ai.
Kalaja deklaroi gjithashtu se është pro protestave kundër Belinda Ballukut, duke theksuar se bindja e tij bazohet në informacionet që disponon dhe në praktikën e SPAK në këtë dosje. Sipas tij, hetimi ka kaluar nga çështja e supervizionit, te tuneli dhe më pas te lotet e Unazës së Madhe.
“Absolutisht jam për protestë kundër Belinda Ballukut e cila në gjykimin tim do të arrestohet, në bazë të informacioneve që kam. E gjithë praktika e SPAK e përdorur në këtë dosje e tregon këtë”, përfundoi Kalaja.
