Dhënia e vendimit për moslejimin e mjeteve të prodhuara para 10 viteve ka shkaktuar pakënaqësi tek të gjithë tregtarët e makinave, gjë që ka shtyrë Ministren e Transporteve ta rishikojë edhe një herë vendimin.
Ministrja ka realizuar një dëgjesë me këtë kategori, ku tregtarët janë shprehur se të tilla vendime mund t’i çojnë ata drejt falimentit.
“Kemi qenë në Gjermani dhe kemi parë që ‘euro 4’. Jemi dakord që euro 3, por ‘euro 4’ nuk kemi arsye pse mos e fut përderisa e pranon Gjermania”, tha një nga tregtarët.
Tregtarët kanë thënë se mjedisin nuk e ndotin automjetet, po cilësia e karburantit që momentalisht përdoret në vendin tonë, kjo është shqetësuese dhe për këtë duhen të merren masa.
” Nuk është pjesë importimi për mendimin tonë është pjesë e karburantit, po shkatërrojnë makinën, por edhe po thithim atë gaz dhe mendoj që gjithë problematika është te karburanti”, u shpreh një nga sipërmarrësit.
Pasi ka dëgjuar të gjitha ankesat dhe problematikat që lindin nga ky vendim, Balluku ka thënë se gjithçka do të merret parasysh dhe do të trajtohet ashtu siç duhet, brenda kritereve ligjore.
“Nuk po them gjë, se do ishte e cekët nga ana jonë të themi pa parë bazën ligjore apo diçka tjetër. Por gjithsesi nuk erdhët kot sot, erdhët për të shprehur problematikën ne do shikojmë sesi do ta zgjidhim, por shumë shpejt në ditët në vijim”, u shpreh Balluku.
