Ministrja e Energjisë dhe Infrastrukturës, Belinda Balluku nga Foltorja e Kuvendit ka hedhur akuza ndaj opozitës duke u shprehur se shpërndajnë informacion të rreme te qytetarët lidhur me krizën.
Balluku: Sot nuk po vuan vetëm sektori i hidrokarbureve, i produkteve ushqimore por po vuajnë të gjithë sektorët. Po vuan edhe ai i ndërtimit për shkak të çmimeve të rritura të produkteve që kontribuojnë në sektorin e ndërtimit. Sot kur të gjithë bashkë duhet të gjenim mundësi për të minimizuar efektet e një krize ndërkombëtare që vazhdoni ta quani jo të tillë, që mundoheni të fshihni faktet, por faktet flasin. Nuk ka asnjë shqiptar që nuk e di se kriza me të cilën përballemi është një krizë globale e nxitur nga lufta mes dy vendeve që janë larg nesh por ama globalizimi këtë sjell. Lufta nuk ka të bëjë me distancën, ka të bëjë me globalizimin. Pjesa më e prekur e kësaj lufte është energjia. Nuk e dimë kur do të përfundojë.
Dëgjova sot që të gjitha produktet e shportës janë rritur nga çmimi i energjisë. Jo nuk janë ndikuar nga çmimi i energjisë por janë ndikuar nga tregjet ndërkombëtare dhe ajo që duhet të themi çmimi është një situatë e rëndë që rëndon mbi çdo familje, mbi çdo qeveri. Tregu po përballet dhe do të përballet me mungesën e produkteve. Në vend që të diskutojmë se si të zgjidhim këtë krizë, jemi këtu duke pritur akuzat tuaja dhe duke humbur kohë se si të sqarojmë qytetarët që ato që ju thoni janë në shumicën e rasteve të rreme.
