Ministri i Brendshëm, Taulant Balla ka reaguar sot me një status në rrjetet sociale, duke iu drejtuar Policisë së Shtetit. Në deklaratën e tij, Balla iu ka kujtuar disi detyrat policisë, duke u shprehur se fokusi i tyre për këtë vit do të jenë krimet ekonomike, evazioni, kontrabanda, krimet kibernetike e shumë të tjera.
Sipas Ballës një koordinim i mirë mes strukturave të policisë dhe organeve ligjzbatuese ndihmon në procesin e integrimit në Bashkimin Europian.
“🇦🇱 Organizimi i veprimtarive ekonomike të paligjshme, të paliçensuara, të cilat shmangin detyrimet fiskale ndaj shtetit dhe vjedhin të drejtat e autorit nga operatorë të tjerë të ligjshëm duhet të vijojë të jetë në fokusin e strukturave👮👮♀️🚔 kundër krimit ekonomik në të gjithë territorin. Rruga e pakthyeshme drejt anëtarësimit në Bashkimin Europian kërkon një koordinim edhe më të mirë mes Policisë së Shtetit dhe agjencive të tjera ligjzbatuese në luftën kundër krimeve ekonomike, evazionit, kontrabandës, krimeve kibernetike, piraterisë etj. Përgëzime Drejtorisë së Policisë Tiranë për fillimin e mbarë të këtij viti në goditjen e aktiviteteve kriminale të kësaj natyre.”, thuhet në reagimin e Ballës.
