Numri dy i Partisë Socialiste dhe drejtuesi politik i Qarkut të Elbasanit, Taulant Balla ka zhvilluar një takim me banorët e zonës së Papërit në Elbasan. Balla u shpreh se këto janë zgjedhjet më të rëndësishme sepse sipas tij përpara 7 viteve, Edi Rama dhe PS filluan të ndërtonin shtet që bazohet mbi ligje.
Ndërsa sa i përket investimeve të bëra në Papër, Balla ka përmendur ato në rrjetin e shpërndarjes së energjisë elektrike,në kanalet vaditëse, në kanalizimet e ujërave të zeza dhe progresin e bërë në procesin e legalizimeve.
“Këto janë zgjedhjet më të rëndësishme sepse në 7 vite, Edi Rama dhe Partia Socialiste filluan për herë të parë të ndërtojnë shtet. Një shtet që bazohet mbi ligjin. Deri në 2013 nuk paguhej energjia elektrike. Në një fshat këtu afër një kandidat i Partisë Demokratike u premtonte se nuk keni për të paguar më energji elektrike. A mund të premtojë një parti politike përsëri pas 30 viteve të njëjtën gënjeshtër që përdorte Saliu?”, tha Balla.
Balla duke ritheksuar rëndësinë e zgjedhjeve të 25 prillit tha se kryeministri Rama i ka dhënë mundësi Shqipërisë të jetë një faktor i rëndësishëm në politikën e Ballkanit Perëndimor e jo vetëm. Ndër të tjera Balla ka sulmuar deri diku edhe opozitën duke i quajtur një grupi politikanësh fosile.
“Ne nuk mund t’ia lëmë qeverisjen e vendit një grupi politikanësh fosile prej 30 vitesh. Ndaj ju bëj thirrje në fletën e votimit të 25 prillit, numrin 12, Partinë Socialiste të Shqipërisë. Vetëm PS dhe Edi Rama e kanë Elbasanin në qendër të vëmendjes. Ta bëjmë Elbasanin qendrën e Shqipërisë”, tha Balla në fund të fjalës së tij.
