Mesa duket përgjigjet e zbuluara mbrëmjen e djeshme ku kreu i Bashkisë së Durrësit bashkëpunonte me krerët e një grupi kriminal, nuk janë të rëndësishme për Partinë Socialiste.
Të gjendur para fakteve dhe provave, përsëri kreu i grupit parlamentar të Partisë Socialiste, Taulant Balla ka deklaruar se Vangjush Dako i plotëson të gjitha kriteret për të qenë edhe një herë në garë për Bashkinë e Durrësit.
Këtë deklaratë, Balla e ka bërë nga studio e “Real Story”, ku edhe është shprehur se i ka lexuar me kujdes përgjigjet, por nuk shikon ndonjë lidhje me vjedhjen e votave.
Gjithashtu ai ka rënë dakord se prokuroria është duke i shqyrtuar proceset e rëndësishme hetimore shumë ngadalë, por gjithsesi kjo mbetet në dorë të këtij institucioni dhe verdikti final i takon vetëm asaj.
“Prokuroria t’ju shkojë deri në fund këtyre çështjeve dhe prova që shpresoj të ketë, dhe të zbardhë CD, por në asnjë rast nuk fajësohet me vepër penale Vangjush Dako dhe asnjë tjetër. Merreni kodin penal dhe me gjeni një vepër penale të kryer nga Dako që ka kryer në zgjedhje. Sa kohë që dosja nuk ka shkuar në gjykatë, sa kohë që nga Prokuroria nuk ka një akuzë të ngritur për z.Dako. është bërë publike se Dako nuk është nën hetim. Dako i plotëson të gjithë kriteret për të kandiduar, por nuk është vendim që merret nga unë dhe Dako por nga PS”, tha Balla.
