Partia Socialiste nuk e ka kapërdirë lehtë refuzimin e dekretit nga ana e presidentit Ilir Meta, për të vendosur Gent Cakajn në krye të ministrisë së Jashtme.
Kreu u grupit parlamentar të PS, Taulat Balla, është shprehur se kreu i shtetit, Meta, nuk e ka të drejtën që të refuzojë dekretin, por t’ia kalojë autoritetit më të lartë ligjvënës.
Balla akuzoi Metën se po sillet si një kryetar alternativ i opozitës.
“Presidenti nuk e ka aspak të drejtën e refuzimit por ka detyrën në cilësinë e kryetarit të shtetit që t’ia kalojë autoritetit më të lartë ligjvënës dhe presidenti i Republikës, i cili është një autoritet që zgjidhet nga parlamenti në asnjë rast nuk mund t’i heqë të drejtën parlamentit për të qenë autoriteti më i lartë. Nëse ka rezerva ia referon Kuvendit.
Ishte apo jo zoti Cakaj, në rast tjetër do gjente diçka tjetër për të thënë që nuk plotësonte kriteret. Ju e patë në rastin e zotit Lleshaj. E gjithë tymnaja rezultoi në fluskë sapuni. Të jeni të sigurt se edhe e gjithë kjo tymnajë në kurriz të një djali të shkëlqyer do rezultojë flluskë sapuni”– tha Balla për News24.
