Numri dy i Partisë Socialiste, Taulant Balla u ndal ditën e sotme në Përrenjas ku deklaroi para mbështetësve se PS-ja është gati për të mos e rikthyer te pengmarrësit e 30 viteve. Ndër të tjera ai e ka ironizuar kryetarin Partisë Demokratike, Lulzim, Basha duke e quajtur një gjumash.
Ai sulmoi PD-në dhe kryedemokratin Lulzim Basha, duke u shprehur se nuk duam në krye të vendit dikë që si ministër i Jashtëm emëronte persona të kriminalizuar në ambasada.
“Është beteja për të mos u rikthyer te pengmarrësit e këtyre 30 viteve. Kemi 30 vite që duhet të luftojmë për ta shpëtuar Shqipërinë nga i njëjti kërcënim. Më thoni mua kush ka të drejtë. Kush duhet të jetë kryeministri i vendit në 4 vitet e ardhshme. Duam një gjumash, duam një vrasës, duam një hajdut, apo një ministër i Jashtëm që emëronte personat e kriminalizuar nëpër ambasada. Ja ky është Lulzim Basha. Në krahun tjetër ne kemi kandidatin tonë për kryeministër, Edi Rama, i cili duhet ta themi shumë qartë. Kur ishte ministër i Kulturës i ndryshoi faqen institucioneve të kulturës dhe filloi komplet një qasje të re në Tiranë”, tha Balla.
Ndër të tjera ai ka vazhduar, duke sulmuar kandidatët e PD-së, duke u shprehur se këta janë “mos o Zot”. Ai ka sulmuar hapur edhe drejtuesin politik për Qarkun e Elbasanit të PD-së, Gazmend Bardhi.
“Nuk po hyj te këta kandidatët e PD-së se këta janë mos o Zot. Nuk e di si mund ta gjej një cun i Përrenjasit veten te këta! Nuk po hyj te Gaz Bardhi por te vendalinjtë. Se Gaz Bardhin nuk e ka ndonjëri në referencë për model”, shtoi ai.
